Qamər surəsi
Rəhman və Rəhim olan Allahın adı ilə
- O Saat yaxınlaşdı və ay bölündü.
(Qamər surəsi, 1)
- Onlar bir möcüzə gördükdə üz döndərib: “Bu, tez keçib-gedən bir sehrdir” deyirlər.
(Qamər surəsi, 2)
- Onlar Peyğəmbəri yalançı saydılar və öz nəfslərinin istəklərinə tabe oldular. Halbuki hər bir iş bərqərar olacaqdır.
(Qamər surəsi, 3)
- Onlara küfrdən çəkindirən neçə-neçə xəbərlər gəlmişdir.
(Qamər surəsi, 4)
- Bu böyük bir hikmətdir. Lakin arxa çevirənlərə təhdidlər nə fayda verə bilər?!
(Qamər surəsi, 5)
- Sən də onları tərk et! Carçının onları xoşagəlməz bir şeyə çağıracağı gün
(Qamər surəsi, 6)
- onlar zəlil baxışlarla gözlərini aşağı dikmiş halda ətrafa yayılan çəyirtkələr kimi qəbirlərindən çıxacaqlar.
(Qamər surəsi, 7)
- Kafirlər carçıya tərəf tələsərək: “Bu nə çətin bir gündür!” – deyəcəklər.
(Qamər surəsi, 8)
- Onlardan əvvəl Nuh qövmü elçiləri yalançı hesab etmişdi. Onlar qulumuzu yalançı sayıb: “O, dəlidir!” – dedilər və ona hədə-qorxu gəldilər.
(Qamər surəsi, 9)
- O, Rəbbinə yalvarıb: “Məni üstələdilər! Mənə kömək et!” – dedi.
(Qamər surəsi, 10)
- Biz göyün qapılarını leysan yağışı ilə açdıq.
(Qamər surəsi, 11)
- Yeri yarıb bulaqlar qaynatdıq. Göydən tökülən və yerdən çıxan sular əzəldən yazılmış bir iş üçün bir-birinə qovuşdu.
(Qamər surəsi, 12)
- Biz onu taxtalardan pərçimlənib mismarlanmış gəmidə daşıdıq.
(Qamər surəsi, 13)
- İnkar edilmiş peyğəmbərə mükafat olaraq o gəmi Gözlərimiz önündə üzüb gedirdi.
(Qamər surəsi, 14)
- Biz onu (həmin hadisəni) nəsillərə ibrət üçün saxladıq. Amma heç bir yada salan varmı?
(Qamər surəsi, 15)
- Görəydin Mənim əzabım və qorxutmağım necə oldu!
(Qamər surəsi, 16)
- Biz Quranı yada salmaq üçün asanlaşdırdıq. Amma heç bir yada salan varmı?
(Qamər surəsi, 17)
- Ad qövmü də elçiləri yalançı saydı. Görəydin Mənim əzabım və qorxutmağım necə oldu!
(Qamər surəsi, 18)
- Biz uzun sürən uğursuz bir gündə onların üstünə çox soyuq külək göndərdik.
(Qamər surəsi, 19)
- O, insanları kökündən çıxardılmış xurma kötükləri kimi qopardıb atırdı.
(Qamər surəsi, 20)
- Görəydin Mənim əzabım və qorxutmağım necə oldu!
(Qamər surəsi, 21)
- Biz Quranı yada salmaq üçün asanlaşdırdıq. Amma heç bir yada salan varmı?
(Qamər surəsi, 22)
- Səmud qövmü də xəbərdarlıqları yalan saydı.
(Qamər surəsi, 23)
- Onlar dedilər: “Özümüzdən olan bir adamamı tabe olacağıq? Onda biz azğınlığa düşər və ağılsız iş görmüş olarıq!
(Qamər surəsi, 24)
- Zikr aramızdan təkcə onamı verildi? Xeyr, o, yalançıdır, lovğadır!”
(Qamər surəsi, 25)
- Sabah onlar kimin yalançı və lovğa olduğunu mütləq biləcəklər.
(Qamər surəsi, 26)
- Biz onları sınağa çəkmək üçün bir dişi dəvə göndərəcəyik. Sən isə gözlə və səbir et!
(Qamər surəsi, 27)
- Onlara xəbər ver ki, bu su, dəvə ilə onlar arasında bölüşdürülmüşdür. Hər biri su içməyə öz növbəsində gəlsin!”
(Qamər surəsi, 28)
- Onlar öz yoldaşlarını çağırdılar. O da dəvəni tutub diz vətərini kəsdi.
(Qamər surəsi, 29)
- Görəydin Mənim əzabım və qorxutmağım necə oldu!
(Qamər surəsi, 30)
- Həqiqətən, Biz onlara bircə tükürpədici səs göndərdik və onlar mal-qara ağılında istifadə edilən quru saman kimi oldular.
(Qamər surəsi, 31)
- Biz Quranı yada salmaq üçün asanlaşdırdıq. Amma heç bir yada salan varmı?
(Qamər surəsi, 32)
- Lut qövmü də xəbərdarlıqları yalan saydı.
(Qamər surəsi, 33)
- Biz onların üstünə qasırğa ilə birgə daşlar göndərdik. Yalnız Lutun ailəsini sübh çağı xilas etdik –
(Qamər surəsi, 34)
- Özümüzdən bir mərhəmət olaraq! Biz şükür edənləri belə mükafatlandırırıq.
(Qamər surəsi, 35)
- Lut onları Bizim əzabımızla hədələdi, onlar isə bu xəbərdarlıqlara şübhə ilə yanaşdılar.
(Qamər surəsi, 36)
- Onlar Lutdan qonaqlarını israrla tələb etdilər. Biz də onları kor etdik və dedik: “Əzabımı və təhdidlərimi dadın!”
(Qamər surəsi, 37)
- Sübh tezdən onlara yaxalarından əl çəkməyəcək bir əzab gəldi.
(Qamər surəsi, 38)
- Elə isə əzabımı və təhdidlərimi dadın!
(Qamər surəsi, 39)
- Biz Quranı yada salmaq üçün asanlaşdırdıq. Amma heç bir yada salan varmı?
(Qamər surəsi, 40)
- Xəbərdarlıqlar Firon nəslinə də göndərildi.
(Qamər surəsi, 41)
- Onlar dəlillərimizin hamısını yalan saydılar. Biz də onları Qüvvət və Qüdrətimizə layiq şəkildə əzabla yaxaladıq.
(Qamər surəsi, 42)
- Sizin kafirləriniz onlardan yaxşıdırmı? Yoxsa Kitablarda sizə toxunulmazlıq vəd edilmişdir?
(Qamər surəsi, 43)
- Yoxsa onlar: “Biz qalib gələcək bir dəstəyik!” – deyirlər?
(Qamər surəsi, 44)
- Bu dəstə mütləq məğlub olacaq və arxaya dönüb qaçacaqdır.
(Qamər surəsi, 45)
- Xeyr! Onlara vəd edilmiş vaxt o Saatdır. O Saat isə daha ağır, daha acıdır.
(Qamər surəsi, 46)
- Şübhəsiz ki, günahkarlar azğınlıq və əzab-əziyyət içindədirlər.
(Qamər surəsi, 47)
- O gün onlar üzüstə Cəhənnəmə sürüklənəcək və onlara: “Cəhənnəmin təmasını dadın!” – deyiləcəkdir.
(Qamər surəsi, 48)
- Biz, həqiqətən də, hər şeyi qədərincə yaratdıq.
(Qamər surəsi, 49)
- Biz bircə dəfə əmr edirik, o da bir göz qırpımında yerinə yetir.
(Qamər surəsi, 50)
- Biz neçə-neçə həmtaylarınızı məhv etmişik. Amma heç yada salan varmı?
(Qamər surəsi, 51)
- Onların etdiyi hər şey əməllərinin yazıldığı kitablarındadır.
(Qamər surəsi, 52)
- Hər bir kiçik və böyük əməl yazılmışdır.
(Qamər surəsi, 53)
- Şübhəsiz ki, müttəqilər Cənnət bağlarında və çaylar kənarında,
(Qamər surəsi, 54)
- qadir Hökmdarın hüzurundakı haqq məclisində olacaqlar!
(Qamər surəsi, 55)
