MƏHƏMMƏD (Ə.S.) PEYĞƏMBƏR sözü ilə əlaqəli ayələr
"MƏHƏMMƏD (Ə.S.) PEYĞƏMBƏR" sözü ilə əlaqəli ayələr
Qovulmuş şeytandan Allaha sığınıram. Rəhman və Rəhim olan Allahın adı ilə.
- Biz səni müjdələyən və xəbərdar edən bir elçi olaraq haqq ilə göndərdik. Cəhənnəm əhli barəsində isə sorğu-suala tutulmayacaqsan.
(Bəqərə surəsi, 119)📋
- Bunlar Allahın ayələridir ki, onları sənə haqq olaraq oxuyuruq. Şübhəsiz ki, sən göndərilən elçilərdənsən.
(Bəqərə surəsi, 252)📋
- Allahın sənə göstərdiyi şəkildə insanlar arasında hökm verəsən deyə Kitabı sənə haqq olaraq nazil etdik. Ona görə də xainlərin müdafiəçisi olma!
(Nisa surəsi, 105)📋
- Ey elçi! Rəbbindən sənə nazil ediləni (Quranı) təbliğ et! Əgər bunu etməzsən, Onun risalətini təbliğ etməmiş olarsan. Allah səni insanlardan qoruyacaqdır. Şübhəsiz ki, Allah inkar edən qövmü doğru yola yönəltməz.
(Maidə surəsi, 67)📋
- De: “Ey insanlar! Həqiqətən, mən göylərin və yerin hakimi olan Allah tərəfindən sizin hamınıza göndərilən elçisiyəm. Ondan başqa heç bir ilah yoxdur. O dirildir və öldürür. Elə isə, həm Allaha, həm də Allaha və Onun sözlərinə iman edən ümmi (təhsili olmayan) elçi olan rəsuluna iman edin! Ona tabe olun ki, bəlkə siz doğru yolu tapa biləsiniz!”
(Əraf surəsi, 158)📋
- Biz elçiləri ancaq müjdələyən və xəbərdar edənlər olaraq göndəririk. Kim iman edib özünü islah edərsə, onlar üçün heç bir qorxu yoxdur və onlar qəm-qüssə görməyəcəklər.
(Ənam surəsi, 48)📋
- De: “Göyləri və yeri yaradan, (yaratdıqlarını) bəslədiyi halda Özü bəslənməyən Allahdan başqasınımı özümə dost tutacağam?!” De: “Mənə ilk müsəlman olmağım əmr edildi və: “Əsla müşriklərdən olma!” (- deyə buyuruldu)”.
(Ənam surəsi, 14)📋
- Bu ona görədir ki, Allahdan başqasına ibadət etməyəsiniz. Mən Onun tərəfindən sizi xəbərdar etmək və müjdələmək üçün göndərilmişəm.
(Hud surəsi, 2)📋
- İnkar edənlər: “Rəbbindən ona bir möcüzə endirilməli deyildimi?” - deyirlər. Sən yalnız xəbərdar edənsən. Hər qövmün doğru yolu göstərən bir rəhbəri vardır.
(Rad surəsi, 7)📋
- O gün hər bir ümmətə, öz içlərindən bir şahid göndərəcəyik. Səni də bunlara şahid gətirəcəyik. Kitabı sənə, hər şeyi bəyan edən və müsəlmanlar üçün hidayət, rəhmət və müjdə olaraq nazil etdik.
(Nəhl surəsi, 89)📋
- Rəbbiniz sizi çox yaxşı tanıyır. Əgər diləyərsə, sizə rəhm edər, diləyərsə, sizə əzab verər. Biz səni onlara vəkil (onları iman etməyə məcbur edən biri kimi) göndərməmişik.
(İsra surəsi, 54)📋
- De: “Mən də sizin kimi bir insanam. Mənə vəhy olunur ki, sizin ilahınız tək olan ilahdır. Ona görə də kim Rəbbinə qovuşacağını ümid edirsə, yaxşı iş görsün və Rəbbinə etdiyi ibadətdə heç kimi Ona şərik qoşmasın!”
(Kəhf surəsi, 110)📋
- (Ey elçi!) Biz səni yalnız aləmlərə rəhmət olaraq göndərdik!
(Ənbiya surəsi, 107)📋
- De: “Ey insanlar, mən sizi açıq-aydın xəbərdar edənəm!
(Həcc surəsi, 49)📋
- Biz səni ancaq müjdə verən və xəbərdar edən olaraq göndərdik.
(Furqan surəsi, 56)📋
- (De:) Şübhəsiz, mənə bu şəhərin (Məkkənin) Rəbbi olan və oranı müqəddəs edən Allaha ibadət etməyim əmr olunmuşdur. Hər şey Onundur. Mənə (Allaha) təslim olanlardan olmağım əmr olunmuşdur.
(Nəml surəsi, 91)📋
- Quran oxumağım da (əmr olunmuşdur). Artıq kim doğru yolu tutarsa, ancaq özü üçün doğru yolu tutmuş olar. Kim doğru yoldan azarsa, de ki: “Mən yalnız xəbərdar edənlərdənəm”.
(Nəml surəsi, 92)📋
- Məhəmməd aranızdakı kişilərdən heç birinin atası deyildir. Lakin o, Allahın Rəsulu və peyğəmbərlərin sonuncusudur. Allah hər şeyi biləndir.
(Əhzab surəsi, 40)📋
- Ey elçi! Həqiqətən, Biz səni şahid, müjdəçi və xəbərdar edən bir elçi olaraq göndərdik.
(Əhzab surəsi, 45)📋
- Həm də Allahın izni ilə Onun yoluna dəvət edən və nur saçan bir çıraq olaraq göndərdik.
(Əhzab surəsi, 46)📋
- Möminlərə də müjdə ver ki, onlar üçün Allah tərəfindən böyük bir lütf vardır.
(Əhzab surəsi, 47)📋
- Biz səni bütün insanlara yalnız müjdəçi və xəbərdar edən bir elçi olaraq göndərdik. Lakin insanların çoxu bunu bilmir.
(Səba surəsi, 28)📋
- Həqiqətən, Biz səni müjdəçi və xəbərdar edən bir elçi olaraq haqq ilə göndərdik. Elə bir ümmət yoxdur ki, onlara xəbərdar edən bir elçi gəlməmiş olsun.
(Fatir surəsi, 24)📋
- Hikmətli Qurana and olsun ki,
(Yasin surəsi, 2)📋
- (Ey Məhəmməd!) Həqiqətən, sən göndərilən elçilərdənsən.
(Yasin surəsi, 3)📋
- Doğru yoldasan.
(Yasin surəsi, 4)📋
- (Bu Quran) yenilməz qüvvət sahibi və mərhəmətli Allah tərəfindən nazil edilmişdir.
(Yasin surəsi, 5)📋
- Ataları xəbərdar edilmədiyinə görə qəflət içində olan bir qövmü xəbərdar edəsən deyə nazil edilmişdir.
(Yasin surəsi, 6)📋
- Biz ona şeir öyrətməmişik, bu ona yaraşmaz da. Bu ancaq (Allah tərəfindən göndərilmiş) bir öyüd və açıq-aşkar Qurandır.
(Yasin surəsi, 69)📋
- (Ey elçi!) De: “Mən ancaq xəbərdar edən bir elçiyəm. Tək olan və hər şeyə qalib gələn Allahdan başqa heç bir ilah yoxdur!
(Sad surəsi, 65)📋
- O, göylərin, yerin və onların arasındakıların Rəbbidir. O, yenilməz qüvvət sahibidir, çox bağışlayandır.
(Sad surəsi, 66)📋
- De: “O, böyük xəbərdir.
(Sad surəsi, 67)📋
- Ancaq siz ondan üz çevirirsiniz.
(Sad surəsi, 68)📋
- Onlar (orada) mübahisə edərkən uca məclisdən (mələklər məclisindən) mənim heç bir məlumatım yox idi.
(Sad surəsi, 69)📋
- Mən ancaq açıq-aydın xəbərdar edən bir elçi olduğum üçün mənə vəhy olunur”.
(Sad surəsi, 70)📋
- Allahdan başqasını özlərinə dost tutanları O, daim izləyir. Sən onların vəkili deyilsən.
(Şura surəsi, 6)📋
- De: “İlk elçi mən deyiləm. Onun (Allahın) mənə və sizə nə edəcəyini də bilmirəm. Mən yalnız mənə gələn vəhyə tabe oluram. Mən yalnız açıq-aşkar xəbərdarlıq edən bir elçiyəm”.
(Əhqaf surəsi, 9)📋
- Şübhəsiz ki, Biz səni şahid, müjdəçi və xəbərdarlıq edən bir elçi olaraq göndərdik ki,
(Fəth surəsi, 8)📋
- Allaha və Rəsuluna iman edəsiniz, ona yardım edib hörmət göstərəsiniz və səhər-axşam Allahı təsbeh edəsiniz.
(Fəth surəsi, 9
)📋
