Hicr surəsi

Qovulmuş şeytandan Allaha sığınıram. Rəhman və Rəhim olan Allahın adı ilə.

• Əlif, Lam, Ra! Bunlar Kitabın və açıq-aydın Quranın ayələridir. (Hicr surəsi, 1)
  
  
• Vaxt gələcək ki, (axirətdə) inkar edənlər: “Kaş biz də müsəlman olaydıq!” - deyə arzulayacaqlar. (Hicr surəsi, 2)
  
  
• Qoy onlar yeyib-içib keflərini sürsünlər və boş ümidlər onları məşğul etsin. Tezliklə (əməllərinin nəticəsini) biləcəklər. (Hicr surəsi, 3)
  
  
• Biz heç bir məmləkəti təyin edilmiş vaxtı çatmadan məhv etmədik. (Hicr surəsi, 4)
  
  
• Heç bir millət öz əcəlini nə tezləşdirə bilər, nə də gecikdirə bilər. (Hicr surəsi, 5)
  
  
• Onlar dedilər: “Ey özünə Zikr (Quran) nazil edilən kəs! Həqiqətən, sən divanəsən! (Hicr surəsi, 6)
  
  
• Əgər doğru danışanlardansansa, bizə mələkləri gətirməli deyildinmi?!” (Hicr surəsi, 7)
  
  
• Biz mələkləri yalnız haqq (əzab) ilə endiririk. O zaman onlara möhlət verilməz. (Hicr surəsi, 8)
  
  
• Şübhəsiz ki, Quranı Biz nazil etdik və əlbəttə, onu Biz qoruyacağıq! (Hicr surəsi, 9)
  
  
• (Ey elçi!) Şübhəsiz, səndən əvvəlki millətlərə də elçilər göndərdik. (Hicr surəsi, 10)
  
  
• Onlar özlərinə gələn hər bir elçiyə istehza edirdilər. (Hicr surəsi, 11)
  
  
• Beləcə, Biz onu (küfrü) günahkarların qəlbinə yeridirik. (Hicr surəsi, 12)
  
  
• Əvvəlkilərin başlarına gələnlər onlara məlum olduğu halda hələ də ona (Qurana) inanmırlar. (Hicr surəsi, 13)
  
  
• Əgər onlara göydən bir qapı açsaydıq və oradan yuxarı çıxsaydılar, (Hicr surəsi, 14)
  
  
• Hökmən: “Sadəcə olaraq gözlərimiz bağlanmış, daha doğrusu, biz sehrlənmişik”, - deyərdilər. (Hicr surəsi, 15)
  
  
• Həqiqətən, Biz göydə bürclər yaratdıq və seyr edənlər üçün onları bəzədik. (Hicr surəsi, 16)
  
  
• Onları daşlanaraq qovulmuş hər bir şeytandan qoruduq. (Hicr surəsi, 17)
  
  
• Ancaq xəlvətcə qulaq asanlar istisnadır. Onu da dərhal yandırıb-yaxan bir ulduz təqib edər. (Hicr surəsi, 18)
  
  
• Yer üzünü döşədik və orada möhkəm dağlar yerləşdirdik. Orada hər şeydən müəyyən ölçüdə (hər cür bitkidən) bitirdik. (Hicr surəsi, 19)
  
  
• Orada həm sizin üçün, həm də ruzisi sizə aid olmayanlar üçün dolanacaq vasitələri yaratdıq. (Hicr surəsi, 20)
  
  
• Elə bir şey yoxdur ki, onun xəzinələri Bizdə olmasın. Biz onu ancaq müəyyən bir ölçü ilə endiririk. (Hicr surəsi, 21)
  
  
• Küləkləri də dölləndirici olaraq göndərdik və göydən su endirdik. Beləcə, o sudan sizə içirtdik. Halbuki (Biz bunu etməsəydik, ehtiyat üçün) siz onu yığıb saxlaya bilməzdiniz! (Hicr surəsi, 22)
  
  
• Şübhəsiz ki, həyat verən də, öldürən də Bizik. (Hər şeyin) varisi də Bizik! (Hicr surəsi, 23)
  
  
• Şübhəsiz, Biz sizdən əvvəl gəlib-gedənləri də, (bundan sonra qiyamətə qədər) kimlərin gələcəyini də bilirik. (Hicr surəsi, 24)
  
  
• Həqiqətən, sənin Rəbbin onları (axirətdə) bir yerə toplayacaqdır. Şübhəsiz ki, O, hikmət sahibidir, hər şeyi biləndir. (Hicr surəsi, 25)
  
  
• Həqiqətən, Biz insanı uzun müddət qalan (rəngi və qoxusu dəyişmiş) quru palçıqdan yaratdıq. (Hicr surəsi, 26)
  
  
• Daha əvvəl cinləri də tüstüsüz oddan yaratmışdıq. (Hicr surəsi, 27)
  
  
• Bir zaman Rəbbin mələklərə demişdi: “Mən uzun müddət qalan (rəngi və qoxusu dəyişmiş) quru palçıqdan bir bəşər yaradacağam. (Hicr surəsi, 28)
  
  
• Mən ona surət verib ruhumdan üfürdüyüm zaman siz dərhal ona səcdə edin (təzim göstərin)!” (Hicr surəsi, 29)
  
  
• Beləliklə, bütün mələklər səcdə etdilər. (Hicr surəsi, 30)
  
  
• İblisdən başqa! O, səcdə edənlərlə birlikdə olmaqdan imtina etdi. (Hicr surəsi, 31)
  
  
• Allah dedi: “Ey İblis! Sənə nə oldu ki, səcdə edənlərlə birlikdə olmadın?” (Hicr surəsi, 32)
  
  
• (İblis) dedi: “Mən uzun müddət qalan (rəngi və qoxusu dəyişmiş) quru palçıqdan yaratdığın bir bəşərə səcdə edən deyiləm!” (Hicr surəsi, 33)
  
  
• Allah dedi: “Elə isə oradan çıx! Çünki sən qovulmusan. (Hicr surəsi, 34)
  
  
• Şübhəsiz, axirət gününə qədər sənə lənət olacaqdır”. (Hicr surəsi, 35)
  
  
• (İblis) dedi: “Ey Rəbbim, elə isə (insanların) dirildiləcəkləri günə qədər mənə möhlət ver!” (Hicr surəsi, 36)
  
  
• Allah dedi: “Sən möhlət verilənlərdənsən; (Hicr surəsi, 37)
  
  
• O məlum günə qədər!” (Hicr surəsi, 38)
  
  
• (İblis) dedi: “Ey Rəbbim! Sən Məni azdırdığına görə mən də mütləq onlara yer üzündə (pis əməlləri) gözəl göstərəcək və onların hamısını azdıracağam. (Hicr surəsi, 39)
  
  
• Ancaq Sənin ixlaslı bəndələrin bundan istisnadır”. (Hicr surəsi, 40)
  
  
• Allah dedi: “Mənə gətirən doğru yol budur! (Hicr surəsi, 41)
  
  
• Sənə tabe olan azğın kimsələr istisna olmaqla, bəndələrim üzərində sənin heç bir hakimiyyətin yoxdur!” (Hicr surəsi, 42)
  
  
• Şübhəsiz ki, onların hamısına vəd olunan yer cəhənnəmdir. (Hicr surəsi, 43)
  
  
• Onun yeddi qapısı var. Hər bir qapı üçün onlardan (cəhənnəmliklərdən) müəyyən bir dəstə vardır. (Hicr surəsi, 44)
  
  
• Şübhəsiz, müttəqilər cənnətlərdə və bulaq başlarında olacaqlar. (Hicr surəsi, 45)
  
  
• (Onlara belə deyiləcək:) “Sağ-salamat və əmin bir şəkildə ora daxil olun!” (Hicr surəsi, 46)
  
  
• Biz onların qəlbindəki kin-küdurəti çıxarıb atdıq. Onlar taxtlar üzərində qardaşcasına qarşı-qarşıya əyləşərlər. (Hicr surəsi, 47)
  
  
• Onlar orada əsla yorğunluq hiss etməz və oradan çıxarılmazlar. (Hicr surəsi, 48)
  
  
• (Ey elçi!) Bəndələrimə xəbər ver ki, həqiqətən, Mən bağışlayanam, rəhmliyəm! (Hicr surəsi, 49)
  
  
• Mənim əzabım da çox ağrılı-acılı əzabdır. (Hicr surəsi, 50)
  
  
• Onlara İbrahimin qonaqları haqqında da xəbər ver! (Hicr surəsi, 51)
  
  
• Bir zaman (mələklər) onun hüzuruna daxil olub: “Salam!” - dedilər. (İbrahim isə:) “Biz, həqiqətən, sizdən qorxuruq!” - dedi. (Hicr surəsi, 52)
  
  
• Onlar dedilər: “Qorxma! Biz səni çox bilikli bir oğlan uşağı ilə müjdələyirik!” (Hicr surəsi, 53)
  
  
• (İbrahim:) “Mən qocalmışkən mənə müjdəmi verirsiniz? Nə (qəribə bir şey) ilə müjdə verirsiniz?” - dedi. (Hicr surəsi, 54)
  
  
• (Mələklər) dedilər: “Biz sənə haqq ilə müjdə veririk. Ona görə də əsla ümidsizliyə qapılanlardan olma!” (Hicr surəsi, 55)
  
  
• (İbrahim) dedi: “Haqq yoldan azanlardan başqa kim Rəbbinin mərhəmətindən ümidini kəsər?!” (Hicr surəsi, 56)
  
  
• “Ey elçilər! (Digər) vəzifəniz nədir?” - dedi. (Hicr surəsi, 57)
  
  
• Onlar dedilər: “Şübhəsiz ki, biz günahkar bir qövmə (əzab vermək üçün) göndərilmişik. (Hicr surəsi, 58)
  
  
• Ancaq Lutun ailəsi istisnadır. Biz, əlbəttə, onların hamısını xilas edəcəyik. (Hicr surəsi, 59)
  
  
• (Lutun) zövcəsindən başqa! Biz onun geridə qalanlardan (əzaba düçar olanlardan) olmasına qərar verdik”. (Hicr surəsi, 60)
  
  
• Elçilər Lut ailəsinin yanına gəldikləri zaman; (Hicr surəsi, 61)
  
  
• (Lut) dedi: “Həqiqətən, siz tanımadığımız insanlarsınız”. (Hicr surəsi, 62)
  
  
• (Mələklər) dedilər: “Əksinə, biz sənə onların şübhə etdiklərini (əzabı) gətirmişik. (Hicr surəsi, 63)
  
  
• Sənə haqqı gətirmişik. Həqiqətən, biz doğru söyləyirik. (Hicr surəsi, 64)
  
  
• Gecənin bir vaxtı ailəni yola çıxart, sən də onların arxasınca get. Sizdən heç kim dönüb arxasına baxmasın və sizə əmr olunan yerə gedin!” (Hicr surəsi, 65)
  
  
• Və ona (Luta) bu əmri vəhy etdik: “Səhər vaxtı bunların (inkar edənlərin) kökü kəsilmiş olacaq”. (Hicr surəsi, 66)
  
  
• Şəhər əhalisi sevinərək (mələklərin yanına) gəldilər. (Hicr surəsi, 67)
  
  
• (Lut) dedi: “Bunlar mənim qonaqlarımdır, məni biabır etməyin! (Hicr surəsi, 68)
  
  
• Allahdan qorxun və məni rüsvay etməyin!” (Hicr surəsi, 69)
  
  
• Onlar dedilər: “Sənə camaatın işinə qarışmağı qadağan etməmişdikmi?” (Hicr surəsi, 70)
  
  
• (Lut) dedi: “Əgər (düşündüyünüz şeyi) edəcəksinizsə, bunlar mənim qızlarımdır (qızlarımla evlənin)!” (Hicr surəsi, 71)
  
  
• (Ey elçi!) Sənin həyatına and olsun ki, həqiqətən, onlar sərxoşluqları (ehtirasları) içində çaşqın bir vəziyyətdə idilər. (Hicr surəsi, 72)
  
  
• Beləcə, günəş doğarkən o qorxunc səs onları yaxaladı. (Hicr surəsi, 73)
  
  
• Oranın altını üstünə çevirdik və onların üstünə odda bişmiş palçıqdan daşlar yağdırdıq. (Hicr surəsi, 74)
  
  
• Şübhəsiz ki, bunda fərasətli kimsələr üçün ibrətlər vardır. (Hicr surəsi, 75)
  
  
• Həqiqətən, o (məhv edilmiş məmləkətin izləri hələ də Məkkədən Şama gedən) yolun üstündə durur. (Hicr surəsi, 76)
  
  
• Şübhəsiz ki, bunda möminlər üçün ibrət vardır. (Hicr surəsi, 77)
  
  
• Həqiqətən, Əykə xalqı da zalım idi. (Hicr surəsi, 78)
  
  
• Biz onlardan da intiqam aldıq. Şübhəsiz, ikisi də (Əykə və Mədyən) görünən bir yol üstündədir. (Hicr surəsi, 79)
  
  
• Hicr əhalisi də elçiləri yalanlamışdı. (Hicr surəsi, 80)
  
  
• Biz onlara da möcüzələrimizi göndərdik. Ancaq onlar bunlardan (bu möcüzələrdən) üz çevirdilər. (Hicr surəsi, 81)
  
  
• Onlar əmin-amanlıqda olmaq üçün dağları yonub evlər düzəldirdilər. (Hicr surəsi, 82)
  
  
• Sübh çağı qorxunc səs onları da yaxaladı. (Hicr surəsi, 83)
  
  
• Qazandıqları isə heç bir şeyi (əzabı) onlardan dəf edə bilmədi. (Hicr surəsi, 84)
  
  
• Göyləri, yeri və onların arasında olanları yalnız haqq ilə yaratdıq. Qiyamət də mütləq gələcəkdir. Ona görə də sən (onlarla hələlik) gözəl şəkildə rəftar et! (Hicr surəsi, 85)
  
  
• Şübhəsiz ki, sənin Rəbbin hər şeyi yaradandır, biləndir. (Hicr surəsi, 86)
  
  
• Şübhəsiz, Biz sənə təkrarlanan yeddi (ayəni) və uca Quranı verdik. (Hicr surəsi, 87)
  
  
• Onlardan bəzi zümrələrə verdiyimiz dünya malına əsla göz dikmə, onlara görə kədərlənmə və möminləri qanadının altına al! (Hicr surəsi, 88)
  
  
• Və de: “Həqiqətən, mən (sizi Allahın əzabı barəsində) açıq-aşkar xəbərdar edənəm!” (Hicr surəsi, 89)
  
  
• Eynilə (Quranı) qisimlərə ayıranlara endirdiyimiz kimi! (Hicr surəsi, 90)
  
  
• O kəslər ki, Quranı hissələrə ayırdılar”. (Hicr surəsi, 91)
  
  
• Rəbbinə and olsun ki, mütləq onların hamısını sorğuya çəkəcəyik - (Hicr surəsi, 92)
  
  
• Etdikləri əməllərə görə! (Hicr surəsi, 93)
  
  
• Sənə əmr olunanı açıq-aydın təbliğ et və müşriklərdən üz çevir! (Hicr surəsi, 94)
  
  
• İstehza edənlərə qarşı Biz sənə yetərik. (Hicr surəsi, 95)
  
  
• Başqa ilahları Allaha şərik qoşanlar yaxın bir vaxtda (kimin haqlı olduğunu) biləcəklər. (Hicr surəsi, 96)
  
  
• Həqiqətən, Biz bilirik ki, onların söylədiklərinə görə sənin canın sıxılır. (Hicr surəsi, 97)
  
  
• Buna görə də həmd-səna ilə Rəbbini təsbeh et (Allahın şəninə təriflər deyib Ona şükür et) və səcdə edənlərdən ol! (Hicr surəsi, 98)
  
  
• Və sənə ölüm gələnə qədər Rəbbinə ibadət et! (Hicr surəsi, 99)
  
  

Əsas Səhifə