Zuxruf surəsi

Qovulmuş şeytandan Allaha sığınıram. Rəhman və Rəhim olan Allahın adı ilə.

• Ha, Mim! (Zuxruf surəsi, 1)
  
  
• Bu açıq-aydın Kitaba and olsun ki, (Zuxruf surəsi, 2)
  
  
• Anlayıb dərk edəsiniz deyə Biz onu ərəbcə bir Quran etdik. (Zuxruf surəsi, 3)
  
  
• Şübhəsiz ki, o (Quran), dərgahımızdakı əsas kitabda (lövhi-məhfuzda) mövcuddur. O, çox ucadır, hikmətlidir. (Zuxruf surəsi, 4)
  
  
• Həddi aşan bir qövm oldunuz deyə Quranı sizə təbliğ etməkdən vazmı keçək?! (Zuxruf surəsi, 5)
  
  
• Biz əvvəlkilərə (keçmiş ümmətlərə) də neçə-neçə elçilər göndərmişdik. (Zuxruf surəsi, 6)
  
  
• Onlar özlərinə gələn hər bir elçiyə istehza edirdilər. (Zuxruf surəsi, 7)
  
  
• Biz onlardan daha güclü olanları da məhv etdik. Əvvəlkilərin məsəlləri (Quranda) verilmişdir. (Zuxruf surəsi, 8)
  
  
• Əgər onlardan: “Göyləri və yeri kim yaratmışdır?” - deyə soruşsan, əlbəttə: “Onları qüdrətli və hər şeyi bilən Allah yaratmışdır!” - deyəcəklər. (Zuxruf surəsi, 9)
  
  
• O, yer üzünü sizin üçün beşik etdi və doğru yolda gedə biləsiniz deyə, orada yollar yaratdı. (Zuxruf surəsi, 10)
  
  
• O, göydən lazımi qədər su endirdi. Beləcə, onunla ölü bir məmləkəti diriltdik. Siz də belə çıxardılacaqsınız. (Zuxruf surəsi, 11)
  
  
• O, bütün cütləri xəlq etdi. Mindiyiniz gəmiləri və heyvanları da sizin üçün yaratdı. (Zuxruf surəsi, 12)
  
  
• Ona görə ki, onlara minəsiniz, sonra da mindiyiniz zaman Rəbbinizin nemətini yada salasınız və belə deyəsiniz: “Bunları bizim xidmətimizə verən Allah pak və müqəddəsdir! Bizim ona gücümüz çatmazdı. (Zuxruf surəsi, 13)
  
  
• Şübhəsiz ki, biz Rəbbimizə dönəcəyik”. (Zuxruf surəsi, 14)
  
  
• Onlar isə Allahın bəndələrindən bir qismini Onun bir hissəsi kimi qəbul etdilər. Həqiqətən, insan açıq-aşkar nankordur. (Zuxruf surəsi, 15)
  
  
• Yoxsa Allah yaratdıqlarından qızları Özünə götürüb oğlanları sizin üçün ayırdı?! (Zuxruf surəsi, 16)
  
  
• Onlardan birinə Rəhman olan Allaha isnad etdikləri (qız uşağı dünyaya gəlməsi) ilə müjdə verilərsə, qəzəblənmiş bir halda üzü qapqara olar. (Zuxruf surəsi, 17)
  
  
• Bərbəzək içində yetişdirilən və çəkişmə zamanı açıq şəkildə danışmağı bacarmayanlarımı (Allaha isnad edirlər)?! (Zuxruf surəsi, 18)
  
  
• Rəhmanın xidmətçiləri olan mələkləri də dişi saydılar. Onların yaradılışınamı şahid oldular?! Onların şahidliyi yazılacaq və (axirətdə) sorğu-sual olunacaqlar. (Zuxruf surəsi, 19)
  
  
• Onlar: “Əgər Rəhman istəsəydi, biz onlara ibadət etməzdik!” - dedilər. Buna dair onların heç bir məlumatı yoxdur. Onlar ancaq yalan danışırlar. (Zuxruf surəsi, 20)
  
  
• Yoxsa bundan əvvəl onlara bir kitab vermişik və onlar ona istinad edirlər?! (Zuxruf surəsi, 21)
  
  
• Xeyr! Onlar: “Biz atalarımızın bir din üzərində olduqlarını gördük. Biz də onların izindən gedirik”, - deyirlər. (Zuxruf surəsi, 22)
  
  
• Səndən əvvəl də hansı məmləkətə xəbərdarlıq edən bir elçi göndərmişiksə, oranın zəngin sakinləri yalnız: “Biz atalarımızın bir din üzərində olduqlarını gördük. Biz də onların izindən gedirik”, - dedilər. (Zuxruf surəsi, 23)
  
  
• (Hər bir elçi öz qövmünə:) “Əgər sizə atalarınızdan gördüyünüz dindən daha doğrusunu gətirmişəmsə, onda necə?!” - demişdi. Onlar isə: “Biz sizinlə göndərilənləri inkar edirik”, - demişdilər. (Zuxruf surəsi, 24)
  
  
• Buna görə də Biz onlardan intiqam aldıq. (Elçiləri) yalanlayanların aqibətinin necə olduğuna bir bax! (Zuxruf surəsi, 25)
  
  
• Vaxtilə İbrahim atasına və qövmünə belə demişdi: “Mən sizin ibadət etdiklərinizdən uzağam! (Zuxruf surəsi, 26)
  
  
• Mən yalnız məni yaradana ibadət edirəm. Şübhəsiz ki, O məni doğru yola yönəldəcəkdir”. (Zuxruf surəsi, 27)
  
  
• İbrahim bu sözü özündən sonrakı nəslinə miras qoydu ki, bəlkə onlar (haqq yola) qayıdalar. (Zuxruf surəsi, 28)
  
  
• Xeyr! Bunlara da, onların atalarına da özlərinə haqq və onu bəyan edən bir elçi gələnə qədər dolanışıq verdim. (Zuxruf surəsi, 29)
  
  
• Haqq (Quran) onlara gəldiyi zaman: “Bu bir sehrdir, biz onu inkar edirik!” - dedilər. (Zuxruf surəsi, 30)
  
  
• Onlar: “Bu Quran iki şəhərdən (Məkkə, yaxud Taifdən) olan böyük bir adama nazil edilməli deyildimi?” - dedilər. (Zuxruf surəsi, 31)
  
  
• Rəbbinin mərhəmətini onlarmı bölüşdürürlər? Onların dünya həyatındakı dolanışıqlarını aralarında Biz bölüşdürdük. Bir-birlərinə iş gördürsünlər deyə onlardan bəzilərini (zənginlik) dərəcəsi etibarilə digərlərindən üstün etdik. Sənin Rəbbinin mərhəməti onların yığdıqlarından daha xeyirlidir. (Zuxruf surəsi, 32)
  
  
• Əgər insanların (inkar edənlərə rəğbət göstərən) bir ümmət olmaları (təhlükəsi) olmasaydı, yalnız Rəhman olan Allahı inkar edənlərin evlərinin tavanlarını və çıxdıqları nərdivanları gümüşdən edərdik. (Zuxruf surəsi, 33)
  
  
• Evlərinin qapılarını və söykəndikləri taxtları da gümüşdən edərdik. (Zuxruf surəsi, 34)
  
  
• Hətta qızıldan edərdik! Bütün bunlar ancaq dünya həyatının dolanışığıdır. Axirət isə Rəbbinin yanında müttəqilərə məxsusdur. (Zuxruf surəsi, 35)
  
  
• Kim Rəhman olan Allahın zikrindən (Qurandan) üz çevirərsə, Biz ona bir şeytanı mübtəla edərik. O da onun ayrılmaz dostu olar. (Zuxruf surəsi, 36)
  
  
• Şübhəsiz ki, şeytanlar onları haqq yoldan çıxardarlar. Onlar isə özlərinin doğru yolda olduqlarını zənn edərlər. (Zuxruf surəsi, 37)
  
  
• Nəhayət, o, Bizim hüzurumuza gəldiyi zaman (şeytan ona): “Kaş mən səndən şərq ilə qərb arası qədər uzaqda olaydım. Sən nə pis dostsan!” - deyər. (Zuxruf surəsi, 38)
  
  
• Haqsızlıq etdiyinizə görə bu gün peşmançılığınız sizə heç bir fayda verməyəcəkdir. Çünki siz əzabda ortaqsınız. (Zuxruf surəsi, 39)
  
  
• (Ey elçi! Haqqı) karlara sənmi eşitdirəcəksən, yaxud kor olanları və açıq-aşkar zəlalətdə olanları sənmi doğru yola yönəldəcəksən?! (Zuxruf surəsi, 40)
  
  
• Biz səni götürüb aparsaq da, heç şübhəsiz, onlardan intiqam alacağıq. (Zuxruf surəsi, 41)
  
  
• Yaxud onlara vəd etdiyimizi (əzabı) sənə göstərəcəyik. Şübhəsiz ki, Bizim onlara gücümüz çatır. (Zuxruf surəsi, 42)
  
  
• Ona görə də sənə vəhy olunandan möhkəm yapış! Həqiqətən, sən doğru yoldasan. (Zuxruf surəsi, 43)
  
  
• Şübhəsiz ki, o (Quran) həm sənin üçün, həm də qövmün üçün öyüd-nəsihətdir. Siz bundan sorğu-sual olunacaqsınız. (Zuxruf surəsi, 44)
  
  
• Səndən əvvəl göndərdiyimiz elçilərimizdən (onların ümmətlərindən) də soruş. Məgər Biz Rəhman olan Allahdan başqa ibadət ediləsi ilahlar təyin etmişik?! (Zuxruf surəsi, 45)
  
  
• Həqiqətən, Biz Musanı möcüzələrimizlə Firona və onun əyanlarına göndərmişdik və o: “Mən aləmlərin Rəbbinin elçisiyəm!” - demişdi. (Zuxruf surəsi, 46)
  
  
• Musa möcüzələrimizi onlara göstərdiyi zaman onlar buna gülmüşdülər. (Zuxruf surəsi, 47)
  
  
• Onlara göstərdiyimiz hər bir möcüzə digərindən daha böyük idi. Bəlkə (haqq yola) qayıdarlar deyə Biz onları müxtəlif əzablarla cəzalandırdıq. (Zuxruf surəsi, 48)
  
  
• Onlar: “Ey sehrbaz! Sənə verdiyi sözün hörmətinə, bizim üçün Rəbbinə dua et (Rəbbin əzabı bizdən götürsün). Həqiqətən, biz doğru yola yönələcəyik!” - dedilər. (Zuxruf surəsi, 49)
  
  
• Lakin Biz əzabı onlardan götürdüyümüz zaman onlar verdikləri sözdən döndülər. (Zuxruf surəsi, 50)
  
  
• Firon öz qövmünə səslənərək belə dedi: “Ey qövmüm! Misirin hökmranlığı və ayaqlarımın altından axan bu çaylar mənim deyilmi? Məgər (mənim əzəmətimi) görmürsünüzmü?! (Zuxruf surəsi, 51)
  
  
• Yoxsa mən sözünü açıq-aydın deyə bilməyən bu aciz adamdan daha xeyirli deyiləmmi?! (Zuxruf surəsi, 52)
  
  
• Ona qızıl bilərziklər verilməli, yaxud onunla birlikdə köməkçi mələklər gəlməli deyildimi?!” (Zuxruf surəsi, 53)
  
  
• Beləcə, Firon öz qövmünü xor görüb aldatdı, onlar da ona itaət etdilər. Həqiqətən, onlar fasiq idilər. (Zuxruf surəsi, 54)
  
  
• Onlar Bizi qəzəbləndirdikləri zaman onlardan intiqam aldıq və onların hamısını suda boğduq. (Zuxruf surəsi, 55)
  
  
• Beləliklə, onları sonradan gələnlər üçün ibrətamiz bir mazi etdik. (Zuxruf surəsi, 56)
  
  
• Məryəm oğlu İsa misal çəkildiyi zaman sənin qövmün buna sevinərək gülmüşdü. (Zuxruf surəsi, 57)
  
  
• Onlar: “Bizim ilahlarımız daha yaxşıdır, yoxsa İsa?” - dedilər. Bunu sənə yalnız mübahisə etmək üçün deyirdilər. Xeyr! Onlar höcətləşən kimsələrdir. (Zuxruf surəsi, 58)
  
  
• İsa nemət verdiyimiz və İsrail oğullarına nümunə etdiyimiz bir bəndədir. (Zuxruf surəsi, 59)
  
  
• Əgər istəsəydik, yer üzündə sizin yerinizə keçəcək mələklər yaradardıq. (Zuxruf surəsi, 60)
  
  
• Həqiqətən, o (İsa), qiyamət vaxtını bildirən bir əlamətdir. Ona görə də əsla ondan şübhə etməyin və Mənə tabe olun! Doğru yol budur. (Zuxruf surəsi, 61)
  
  
• Şeytan sizi doğru yoldan çıxartmasın! Həqiqətən, o sizin açıq-aydın düşməninizdir. (Zuxruf surəsi, 62)
  
  
• İsa açıq-aşkar möcüzələrlə gəldiyi zaman belə demişdi: “Mən sizə hikmət gətirmişəm və ixtilafa düşdüyünüz məsələlərin bir qismini açıqlamaq üçün gəlmişəm. Ona görə də Allahdan qorxun və mənə itaət edin! (Zuxruf surəsi, 63)
  
  
• Şübhəsiz ki, Allah mənim də, sizin də Rəbbinizdir. Elə isə Ona ibadət edin! Doğru yol budur”. (Zuxruf surəsi, 64)
  
  
• Ancaq onların arasından çıxan firqələr ixtilafa düşdülər. Acı bir günün əzabı ilə qarşılaşacaq o zalımların vay halına! (Zuxruf surəsi, 65)
  
  
• Onlar özləri də fərqində olmadan qəfildən qiyamətin gəlməsinimi gözləyirlər?! (Zuxruf surəsi, 66)
  
  
• O gün müttəqilər istisna olmaqla, dostlar bir-birinə düşmən olacaqlar. (Zuxruf surəsi, 67)
  
  
• (O gün Allah müttəqilərə belə səslənəcəkdir:) “Ey bəndələrim, bu gün sizə heç bir qorxu yoxdur və siz kədərlənməyəcəksiniz! (Zuxruf surəsi, 68)
  
  
• Ey ayələrimizə iman edib müsəlman olanlar! (Zuxruf surəsi, 69)
  
  
• Zövcənizlə birlikdə sevinc içində cənnətə daxil olun!” (Zuxruf surəsi, 70)
  
  
• Cənnətdə onların ətrafında qızıl sinilər və qədəhlər dolandırılacaq. Orada qəlbin istədiyi və gözlərin xoşlandığı hər şey mövcuddur. Siz orada əbədi qalacaqsınız. (Zuxruf surəsi, 71)
  
  
• Varis olduğunuz bu cənnət etdiyiniz əməllərin qarşılığıdır. (Zuxruf surəsi, 72)
  
  
• Orada sizin üçün yeyəcəyiniz bir çox meyvələr vardır. (Zuxruf surəsi, 73)
  
  
• Şübhəsiz, günahkarlar cəhənnəm əzabında əbədi qalacaqlar. (Zuxruf surəsi, 74)
  
  
• Onların əzabı yüngülləşdirilməyəcək və onlar orada ümidsiz qalacaqlar. (Zuxruf surəsi, 75)
  
  
• Biz onlara zülm etmədik, lakin onlar özləri zalım idilər. (Zuxruf surəsi, 76)
  
  
• Onlar: “Ey Malik! Rəbbin bizim canımızı alsın!” - deyə səslənəcəklər. O da: “Siz (bu vəziyyətdə) qalacaqsınız!” - deyəcəkdir. (Zuxruf surəsi, 77)
  
  
• “Həqiqətən, Biz sizə haqqı gətirmişdik, lakin sizin çoxunuz haqqı xoşlamırdı”. (Zuxruf surəsi, 78)
  
  
• Yoxsa onlar bir işə (elçisin qətlinə) qərar veriblər?! Şübhəsiz, Biz də Öz qərarımızı vermişik. (Zuxruf surəsi, 79)
  
  
• Yoxsa onlar öz sirlərini və gizli danışıqlarını eşitmədiyimizimi zənn edirlər?! Xeyr! Onların yanındakı elçilərimiz (mələklər) də yazırlar. (Zuxruf surəsi, 80)
  
  
• De: “Əgər Rəhman olan Allahın bir övladı olsaydı, ona ibadət edənlərin ilki mən olardım. (Zuxruf surəsi, 81)
  
  
• Həm göylərin və yerin, həm də ərşin Rəbbi olan Allah onların aid etdikləri sifətlərdən uzaqdır, pakdır!” (Zuxruf surəsi, 82)
  
  
• Ona görə də qoy onlar vəd olunduqları günə qovuşana qədər (batil işlərinə) dalıb əylənsinlər. (Zuxruf surəsi, 83)
  
  
• Göydə də, yerdə də ilah Odur. O, hikmət sahibidir, hər şeyi biləndir. (Zuxruf surəsi, 84)
  
  
• Göylərin, yerin və onların arasındakıların hökmranı olan Allah çox ucadır! Qiyamət vaxtını da O bilir. Siz Ona qaytarılacaqsınız. (Zuxruf surəsi, 85)
  
  
• Ondan başqa dua etdikləriniz şəfaət etməyə qadir deyillər. Ancaq bilərək haqqa (tövhidə) şahidlik edənlər bundan istisnadır. (Zuxruf surəsi, 86)
  
  
• Əgər onlara özlərini kim yaratdı deyə sual versən, əlbəttə: “Allah!” - deyəcəklər. Bəs necə olub (haqq yoldan) döndərilirlər?! (Zuxruf surəsi, 87)
  
  
• Onun (elçinin) dediyi söz belə idi: “Ey Rəbbim! Həqiqətən, bunlar iman etməyən bir qövmdür”. (Zuxruf surəsi, 88)
  
  
• Elə isə sən “Salam!” deyib onlarla xoş rəftar et! Onlar tezliklə biləcəklər. (Zuxruf surəsi, 89)
  
  

Əsas Səhifə